વહી આવે … – ડૉ. વીરેન પંડ્યા (વિરલ)

વહી આવે બહાર બધું અંદરનું પાણી, જો માટીનાં માટલાંઓ તૂટે,
એમ વહે આંખોનાં આસુંઓ ધસમસતા, ફૂટલું નસીબ વધુ ફૂટે!

માંડ માંડ મેળ કરી ફોરમ ભરવાનાં, ને હૈયાને દેવાની ધરપત :
‘થઇ જાશું પાસ. પછી દાળદર ફીટશે ને જીવતરમાં વર્તાશે બરકત !’
આવી સૌ આશાનાં વહેતાં ઝરણાંઓનાં પાણીડાં અણધાર્યા ખૂટે!
વહી આવે0

ક્યાં સુધી રાખવો ભરોસો એ કહી દો, તો સહેવાની કરીએ તૈયારી,
તમ્મારી પાસે છે દરવાજા મોકળાં, પણ અમ્મારે એક જ આ બારી;
આશ્વાસન આપીને, આસુંઓ લૂંછીને, ફરી ફરી ત્યાંનાં ત્યાં લૂંટે!
વહી આવે0

-‘વિરલ’ (૨૯/૦૧/૨૦૨૩, રાત્રે ૧૧:૨૬)

Prayas An Extension… A Peer reviewed literary e journal, ISSN – 2582-8681, vol. 4, Issue 1, Jan.-Feb:2023