મારી આંખો કોઈ કાલ્પનિક વિશ્વમાં ઘટી રહેલી ઘટના પર મંડાઈ હતી. મેં જોયેલા અસંખ્ય પોર્ન વિડીયોમાં આવતાં ઉત્તેજક અને જુગુપ્સાપ્રેરક દ્રશ્યોનાં ટુકડાંઓ ગોઠવાઈને જિગ્સૉની માફક મારી કલ્પનામાં ભજવાઈ રહ્યાં હતાં. એક પુરુષનું અને એક સ્ત્રીનું નગ્ન શરીર એકમેકમાં સંયોજાઇને અસીમ આનંદનો અનુભવ કરાવી રહ્યું હતું, જેના પરિણામ સ્વરૂપ મારો હાથ બમણા જોરે પોતાનું કામ કરી રહ્યો હતો. કલ્પનામાં દેખાઈ રહેલા પુરુષનો ચહેરો મારો પોતાનો જ હતો, જયારે સ્ત્રીનો ચહેરો ઘડીકમાં એન્જેલિનાનો, તો ઘડીકમાં માયરાનો, તો ઘડીકમાં લ્યુસીનો તો ઘડીકમાં ……એમ પાનાંની જેમ પલટાઈ રહ્યો હતો. સતત પોર્ન વિડીયો જોવા ટેવાયેલી મારી આંખોમાં છેલ્લા દોઢેક વરસથી ન જાણે કેટલીય છોકરીઓનાં ચહેરાઓ સ્ટોર થઇ ગયેલા હતા જે હવે એક-એક કરીને મારા દૃશ્યપટલ પર ઉપસી આવતા હતા.
ઝીરોના બલ્બ જેવા મામૂલી પ્રકાશમાં, બેડ પર નિર્વસ્ત્ર થઈને હું માસ્ટરબેશન કરી રહ્યો હતો. મારા શરીરમાં ગરમી વધી રહી હતી. અલગ અલગ પોઝિશનમાં સેક્સ કરતાં કપલનાં દ્રશ્યો ચાલી રહ્યાં હતાં. સ્ત્રીના ચહેરામાં આયુષી, તારા અને કોલેજની બીજી ઘણી છોકરીઓનાં ચહેરા આવીને જતા રહ્યાં હતાં. હવે, ગઈકાલે કોલેજમાં જોયેલી પેલી લાંબા વાળ અને ઝીરો ફીગરવાળી મિશાનો ચહેરો દેખાઈ રહ્યો હતો. મારી કલ્પનામાં હું પોતાને જ અલગ અલગ છોકરીઓનાં શરીર સાથે સેક્સ માણતો જોઈને ઉત્તેજિત થવાનાં ઠાલાં પ્રયત્નો કરી રહ્યો હતો.
એવામાં એ સ્ત્રીનો ચહેરો અસ્મિતાના ચહેરામાં પલટાઈ ગયો અને માસ્ટરબેશન કરતો મારો હાથ ધીમો પડ્યો. પલંગ પર ઉઘાડા પડેલા મારા શરીરમાં પુષ્કળ વેગે વહેતા લોહીની ગતિ ધીમી પડી અને શ્વાસ હેઠો બેઠો.
કલ્પનામાં દેખાતું સેક્સ દ્રશ્ય ઝાંખું પડવા લાગ્યું. છેલ્લી ઘણી રાતોની જેમ આજે પણ મારો હાથ ધીમે-ધીમે ચાલતો બંધ થયો. પસીનાનું એક પાતળું થર એસીની હવામાં સુકાતું ગયું અને મારી આંખો કલ્પનાની દુનિયામાંથી સ્વપ્નપ્રદેશમાં પટકાઈ.
‘જો અનંત, હું સમજી શકું છું તારી પીડા. અસ્મિતા સાથેના બ્રેકઅપ પછી તારું આ ડિપ્રેશન તને અંદરથી ખોખલો કરી નાખશે. મારી વાત માનતો હોય તો તું તારું ભાડા પરનું ઘર છોડ અને મારી સાથે રહેવા આવી જા. તારા ભાડા પરનાં ઘરમાં તું એકલો ને એકલો કટાઈ જઈશ.’ – સુમિતના શબ્દો.
‘એ સાલા હરામખોર, (ગાળ), ડુક્કરની જેમ જ્યાંત્યાં મોઢું મારવાનું બંધ કર. કેટલી છોકરીઓને તારી હવસનો શિકાર બનાવીશ (ગાળ)…..’ – વિવેકના શબ્દો.
‘સેક્સ માટે આમ તરફડીયા મારવાનું બંધ કર. સેક્સ સિવાય પણ આ દુનિયામાં ઘણું બધું છે અનંત….તને સાચે જ કોઈ સ્ટેબલ રિલેશનશિપની જરૂર છે. તને એક સાચા પ્રેમની જરૂર છે.’ – આયુષીના શબ્દો.
‘…….આને હાયપર સેક્સુઅલ ડિસઓર્ડર કહેવાય છે અને આવા વ્યક્તિઓને ‘સેક્સ મેનીએક’ કહે છે. આમાં વ્યક્તિ પોતાની જાતને તો નુકશાન કરે જ છે પણ ક્યારેક ક્યારેક બીજાને પણ નુકશાન કરી બેસે છે. એટલે ગમે તે રીતે તને પોર્નોગ્રાફીની દુનિયામાંથી બહાર આવવાની જરૂર છે. પોર્ન અમે પણ જોઈએ છીએ પણ તારી જેમ આખા દિવસ-રાત નહિ. તું કહેતો હોય તો આપણે ડોક્ટરને કન્સલ્ટ કરીએ….’ -નિકુંજના શબ્દો.
અને છેલ્લે……
‘ધીસ રિલેશનશિપ હેઝ નો ફ્યુચર અનંત. યુ નો, માય ફેમિલી ઇઝ ઓર્થોડોક્સ. ધે વિલ નોટ એક્સેપટ ધીસ રિલેશન, સો બેટર વી શૂડ સ્ટોપ હીઅર એન્ડ મૂવ ઓન….’- અસ્મિતાના શબ્દો.
અલગ અલગ લોકોના શબ્દો વંટોળની જેમ મારી આસપાસ ચકરાવા લઈને મને અથડાયા કરતા હતા. હું હવામાં આમતેમ હાથ વીંઝતો હતો પણ અસ્મિતાના શબ્દો મારા કાનને ચીરી નાખવાની હદ સુધી પહોંચી ગયા હતા. એકાએક બે હાથ કાન પર ઢાંકીને મારાથી ભયાનક ચીસ નીકળી ગઈ અને હું એક ધક્કા સાથે બેડમાં બેઠો થઇ ગયો.
મારી ચીસ હવાને ભેદીને હવામાં જ વિખરાઈ ગઈ. મેં ફાટેલી આંખોથી આસપાસ જોયું. હવે, હું સ્વપ્નપ્રદેશમાંથી વાસ્તવિક જગતમાં આવી ચૂક્યો હતો. એવું જગત, જ્યાં છેલ્લા ઘણા સમયથી રહેવું મારા માટે અસહ્ય થઇ પડ્યું હતું. અહીં બધું જ નીરવતામાં લપેટાયેલું હતું ; બધું વેરવિખેર થઇ ગયા પછીની નીરવતા! એસીના ઘરરરર….ઘરરરર…અવાજ સિવાય બધું જ ચિરનિંદ્રામાં સૂતું હોય એમ પડ્યું હતું, જાણે મારી ચીસ કોઈએ સાંભળી જ ન હોય!
થોડીવાર પછી મારું મગજ ઠેકાણે પડ્યું હોય એમ મેં આજુબાજુ નજર ફેરવી. બેડ પર પડેલો મારો મોબાઈલ લીધો. પપ્પાના વીસ મિસ્ડકોલ આવેલા….વૉટ્સઅપ પર પપ્પાનો મેસેજ હતો – અનંત, વ્હેર આર યુ? તને કેટલા કોલ કરવાના ? કઈ દુનિયામાં છે આજકાલ ? મારો મેસેજ જોઈને કોલ કરજે અને આવનારા રવિવારની તારી મુંબઈ આવવાની ટિકિટ બુક કરી છે. અર્જન્ટ કામ છે.
મોબાઈલમાં આવતીકાલની ટિકિટ પણ હતી.
*****
મારી કોલેજ એટલે એક હેપનિંગ પ્લેસ. કલાસરૂમ કરતા વધારે કેન્ટીનમાં કાં તો કેમ્પસમાં અમે મળી આવતા. મોટાભાગે હું, અસ્મિતા, નિકુંજ, સુમિત, આયુષી અમે બધા સાથે જ હોઈએ. મારું અને અસ્મિતાનું ચક્કર આખા કોલેજને ખબર પણ નિકુંજ, સુમિત અને આયુષીને અમારા કાંડ પણ ખબર. અસ્મિતાનું બધા સાથે બહુ બનતું નહિ કારણકે એને ઇંગ્લિશ સિવાય બીજી કોઈ ભાષા આવડતી નહિ. હિન્દી સમજી શકતી પણ બોલી શકતી નહિ.
મારો ફ્લર્ટિંગ નેચર અને હેન્ડસમ હંક જેવી બોડી ઘણી છોકરીઓને મારા તરફ આકર્ષતી, જેની મને બહુ પહેલેથી ખબર હતી. કોલેજનાં શરુ-શરૂનાં દિવસોથી જ અસ્મિતા મને આંખોનાં ખૂણેથી તાકતી. એની આંખોમાં રહેલી વ્યાકુળતા હું સમજી ગયો અને ધીમેધીમે અમારો સંબંધ દોસ્તીનો રસ્તો છોડી નવી કેડી પર પગરવ માંડવા લાગ્યો.
આખો દિવસ અમે કોલેજમાં કોઈક ને કોઈક ઇવેન્ટ ઓર્ગનાઇઝેશન, કોમ્પિટિશન, પ્રોજેક્ટ વર્ક કે પછી લેક્ચર (ભાગ્યે જ !) અટેન્ડ કરવાનું કામ કર્યા કરતા અને રાતે અચૂક નાઈટ-આઉટ કે પછી કોઈના ફ્લેટ પર પાર્ટી…..પાર્ટી પત્યા પછી હું અને અસ્મિતા મારા રૂમ પર જતા અને પછી…………
એક દિવસ ટપરી પર ચાની ગરમાગરમ ચુસ્કી લેતા નિકુંજે મને પૂછેલું ‘અનંત, તને નથી લાગતું કે તું તારા અને અસ્મિતાનાં રિલેશનને વધારે સિરિયસલી લઇ રહ્યો છે?’ મને સમજાયું નહિ, એણે આગળ કહ્યું ‘ડોન્ટ ટેક ઈટ અધરવાઇઝ, પણ મને લાગે છે તું અસ્મિતાને સાચે જ પ્રેમ કરવા લાગ્યો છે જે કદાચ એકતરફી છે. હું અસ્મિતાને સારી રીતે ઓળખું છું. એ આજના સમયની બોલ્ડ અને ફાસ્ટ ફોરવર્ડ છોકરી છે. એ તારી સાથે ફક્ત મજા કરવા માટે છે. છ મહિના પછી કોલેજ પૂરી થશે પછી આ રિલેશનશિપનું શું ફ્યુચર છે, તે વિચાર્યું છે ?’ હું કંઈ નહોતો બોલી શક્યો કારણકે મેં આ વિશે કોઈ વિચાર જ નહોતો કર્યો.
નિકુંજ અવારનવાર મને આ બાબતે ચેતતો હતો પણ હું મારી મસ્તીમાં એની વાતને ઇગ્નોર કરતો રહ્યો.
કોલેજની લાસ્ટ સેમિસ્ટરની એકઝામ પૂરી થયાનાં બીજા દિવસે અસ્મિતાએ મને સાંજે કોફીશોપમાં મળવા મેસેજ કરેલો. કોફીશોપમાં કોફી ઓર્ડર કર્યા પછી અસ્મિતાએ મારી આંખોમાં આંખો નાખીને કહેલું ‘અનંત, માય કોલેજ જર્ની વોઝ વેરી બ્યુટીફૂલ બિકોઝ ઓફ યુ. બટ નાઉ ધીસ જર્ની કૅમ ટુ એન એન્ડ ……’
હું કંઈ સમજી શકું એ પહેલા જ એણે એની આવતીકાલે કોલકત્તાની જવાની વાત કરતા સ્પષ્ટપણે કહ્યું ‘ધીસ રિલેશનશિપ હેઝ નો ફ્યુચર અનંત. યુ નો, માય ફેમિલી ઇઝ ઓર્થોડોક્સ. ધે વિલ નોટ એક્સેપટ ધીસ રિલેશન, સો બેટર વી શૂડ સ્ટોપ હીઅર એન્ડ મૂવ ઓન….’
પહેલી વખત એના આ ઇંગ્લીશમાં બોલાયેલા શબ્દો મને હાડોહાડ વાગ્યા. એની આંખોમાં આ રિલેશન પૂરી થયાનો લેશમાત્ર રંજ દેખાતો નહોતો પણ મારા તો શબ્દો જ ખોવાઈ ગયા હતા અને કદાચ હું પણ……
કોફીશોપમાં બ્રેકઅપ કર્યાનાં બીજા જ દિવસે એ કોલકત્તા જતી રહી અને હું ડિપ્રેશન ફેઝમાં….
ઝાડ જેટલી સરળતાથી પાંદડું ખેરવે એટલે સરળતાથી એણે આ સંબંધને છોડી દીધો અને હું એ તરછોડાયેલા પાંદડાની જેમ અહીંતહીં ફંગોળાતો રહ્યો. મારા માટે આ સંબંધને ભૂલવું – અસ્મિતાને ભૂલવી, એની સાથે વિતાવેલી રાતોને ભૂલવી અઘરી હતી. હું એને ફોન પર ફોન, મેસેજ પર મેસેજ કરતો રહ્યો અને એ મને ઇગ્નોર કરતી રહી. સોશિયલ મીડિયા પર પણ એના એકાઉન્ટ ઇનએક્ટિવ થઈ ગયા. એકાએક આવી પડેલી અવહેલનાની કાળી છાયા મારા પર ઘેરી થવા લાગી. મને અસ્મિતા સિવાય કંઈપણ સૂઝતું નહિ – આખો દિવસ એના જ વિચારો, એનો જ ચહેરો, એની જ વાતો મારા મગજમાં માખીની જેમ બણબણ્યાં કરતી.
મારું મનોમગજ જ નહિ; મારું શરીર પણ અસ્મિતાનાં શરીરને ઝંખતું. અનિયંત્રિત એવા સેક્સુઅલ હોર્મોન્સના ઉભરા આવ્યા કરતા અને મારી બેચેની વધતી જતી. ડૂબતો તરણું ઝાલે એમ એ દિવસોમાં હું પોર્ન વીડિયોના રવાડે ચઢ્યો. પોર્ન વીડિયો અને માસ્ટરબેશન મને થોડા સમય માટે તો થોડા સમય માટે પણ આશરો આપતા. મારા આવેગો માસ્ટરબેશનથી થોડીવાર શાંત પડતા.
હું હવે ઘરની બહાર નીકળતો નહિ અને આખો દિવસ લેપટોપ પર પોર્ન વીડિયો જોતો પડ્યો રહેતો. મને બીજું કંઈ જ સૂઝતું નહિ. મેં જિમ જવાનું, યોગા કરવાનું અને નિકુંજ કે સુમિતને મળવાનું પણ છોડી દીધું હતું. ક્યારેક એમના મેસેજ ટપકી પડતા પણ હું તેમને ઇગ્નોર કરવા લાગેલો. આમ તો મને મારું જીવવું જ હવે ગમતું નહોતું. ક્યારેક થતું કે એક રાતે બિલ્ડિંગની અગાસી પરથી પડતું મૂકી દઉં પણ ઘરની બહાર નીકળવાની પણ હિમ્મત થતી નહિ.
ઉપરાઉપરી માસ્ટરબેશન અને પોર્ન વિડીયો જોતા એક જ વરસમાં મને વિચિત્ર કમજોરીનો અહેસાસ થવા લાગ્યો અને મને સિગારેટ -દારૂની લત લાગી. કોલેજ તો ક્યારનીયે પૂરી થઇ ગઈ હતી એટલે કોલેજ જવાનો કોઈ સવાલ જ નહોતો. મુંબઈ મને જવું નહોતું એટલે પુણેની રૂમમાં મારી બેચેન જિંદગી પાંજરામાં પુરાયેલા પંખીની જેમ વીતવા લાગેલી. એવામાં એક દિવસ પપ્પાએ આવનારા રવિવારે મને મુંબઈ બોલાવ્યો અને ટિકિટ પણ મોકલાવી.
*****
કીર્તિ ……એનો કૂંપળ ફૂટ્યા જેવો તાજો ચહેરો, તગતગતી આંખો, ખુલ્લા લહેરાતા વાળ અને સ્નિગ્ધ શરીર ……
બીજી જ મુલાકાતમાં અમારી સગાઇ નક્કી થઇ ગઈ.
જ્યારથી પુણેની કોલેજમાં એડમિશન લીધેલું ત્યારથી મુંબઈ ભૂલાઈ ગયેલું. આજે લગભગ બે વરસ પછી હું મુંબઈ આવ્યો હતો. અહીં મુંબઈમાં મારા પપ્પા ઓફિસમાં સતત બીઝી રહેતા. મમ્મીને ગયે તો ઘણાં વરસ થઇ ગયેલાં. પપ્પા સાથે હું ભાગ્યે જ વાત કરતો – કામ પૂરતી અથવા પૈસા જોઈતા હોય તો. હવે તો વાત કરવાની પણ જરૂર પડતી નહિ. હું પપ્પાને વોટ્સઅપ મેસેજ કરી દેતો અને પપ્પા પૈસા અકાઉન્ટમાં ટ્રાન્સફર કરી દેતા.
સગાઇ થયા પછી હું પુણે પાછો જવા માંગતો હતો પણ પપ્પાએ મને રોકી રાખ્યો. પપ્પાએ ઓફિસમાં રજા લીધી હોવાથી મુંબઈના આ ઘરમાં મને જોઈતું એકાંત મળતું નહિ. મારા ફાટફાટ થતાં શારીરિક આવેગો મને ત્રસ્ત કરતા પણ એને દબાવી રાખ્યા સિવાય છૂટકો નહોતો. મોટેભાગે બાથરૂમમાં મને થોડું એકાંત મળતું પણ એ હવે મારા માટે પર્યાપ્ત નહોતું.
આ દિવસો દરમ્યાન કીર્તિ સાથે ફરવા જવાનું થતું. ગોગલ્સની આડશે હું કીર્તિના સ્તનોનાં ઉભાર પર નજર ફેરવ્યા કરતો. એ જયારે લો-કટ ડ્રેસ પહેરીને આવતી ત્યારે એના ક્લીવિજને જોતા મારી અંદર સળવળાટ થતો. કીર્તિ બોલબોલ કરતી પણ ન તો મારું ધ્યાન કીર્તિની વાતો પર રહેતું, ન તો એના ચહેરા પર. પણ એક વાત માનવી પડે કે કીર્તિનો એની જાત પરનો કંટ્રોલ ગજબ હતો. એ મને ચુંબનથી આગળ વધવા દેતી નહિ. અને આ જ કંટ્રોલ મને કીર્તિ તરફ વધુ ને વધુ ખેંચતો એ જ રીતે જે રીતે એકસમયે હું આયુષી તરફ ખેંચાયેલો.
અસ્મિતા પહેલા આયુષી સાથે મારી દોસ્તી થઇ હતી. હા, એ તો દોસ્ત તરીકે જ રાખતી પણ મારા માટે દોસ્તી સંબંધની હદ નહોતી. મુંબઈથી પુણે આવ્યા પછી હું થોડા દિવસ દોસ્તો સાથે ભાડેથી રહેલો પણ એમાં મને જોઈતી આઝાદી મળતી નહોતી. એટલે એક દિવસ દોસ્તોનું ઘર છોડીને હું અલગથી ભાડે રહેવા ગયો.
આયુષીને હું મારા કલ્પનાનાં સેક્સસીનમાં જોયા કરતો અને ઘણીવાર આક્રમક થઈ જતો. પણ આયુષી મારી સાથે એક સેફ-ડિસ્ટન્સ જાળવી રાખતી. એક દિવસ એણે કંટાળીને સ્પષ્ટપણે એના બોયફ્રેન્ડની વાત કરી અને મને દૂર રહેવાની સલાહ આપી.
ત્યારથી મને પોતાની જાત પર કંટ્રોલ રાખી શકતી છોકરીઓ ખૂબ આકર્ષતી.
એક સાંજે બજારમાં ફરતા ફરતા મને તારા દેખાઈ – તારા સક્સેના. જેણે મને સેક્સનો પહેલો અનુભવ આપેલો અને પોર્ન વીડિયોની દુનિયા બતાવેલી.
એ વખતે હું સ્કૂલમાં હતો. સ્કૂલથી છૂટીને પોતાના દોસ્તો સાથે ક્રિકેટ રમવા મેદાનમાં જતો. એ મેદાનની સામેના એપાર્ટમેન્ટમાં તારા રહેતી. દસમા ધોરણમાં ભણતો હોવા છતાં મારું શરીર ખાસ્સું એવું પરિપક્વ થઇ ગયેલું. તારા પોતાના ઘરની બારીમાંથી મને જોયા કરતી. એક દિવસ એણે મને ઈશારો કર્યો અને ક્રિકેટ પત્યા પછી હું એના ઘરે ગયેલો. બારગર્લ તારા મારાથી પંદરેક વર્ષ મોટી હશે, પણ એનો દેખાવ, એના કપડાંની બહાર ઉપસી આવતા અંગો અને એનો માદક સ્પર્શ – યાદ આવતા જ મને ઝણઝણાટી આવી જતી.
એ દિવસો દરમ્યાન મારા હોર્મોન્સ એકાએક જાગી ગયેલા અને તારા આ જાગેલા હોર્મોન્સને પોતાના શરીરથી પોષતી.
તારાને બજારમાં જોયા પછી બીજા જ દિવસે હું કંઈ કીધા વગર તારાનાં ઘરે પહોંચી ગયો. મને આમ અચાનક આવેલો જોઈને એ પોતાનો કાબુ ગુમાવી બેઠી. અમે બંને પોતાના આવેગોને ખુલ્લો દોર આપીને એકમેકને ઠારતા રહ્યાં. તારાનું શરીર મને ચરમસીમાએ લઇ ગયું. હું એ દિવસે તારાના ચહેરાને જોઈ શક્યો નહિ. કદાચ તારાને ચહેરો હતો જ નહિ, એને હતું તો ફક્ત શરીર અને એ શરીરમાંથી જ્વાળામુખીની જેમ ફાટતા આવેગો! એ આવેગોથી હું જકડાઈ જતો, તૂટી જતો અને ફીણ ફીણ થઈને કિનારા લગી આવી જતો.
આમ મારા દસેક દિવસ તારાનાં સહારે મુંબઈમાં વીતી ગયા અને હું પુણે આવી ગયો.
પુણે આવ્યા પછી મેં રાહતનો શ્વાસ લીધો. અહીં મને રોકવા- ટોકવાવાળું કોઈ નહોતું. ઓનલાઇન જમવાનું ઓર્ડર કરીને હું આખો દિવસ લેપટોપ પર પોર્ન લગાવી પડ્યો રહેતો. અસ્મિતા સાથેના બ્રેકઅપ પછી મારું પોર્ન એડિક્શન કોઈ રાક્ષસની જેમ વધ્યું હતું. કોઈ ફિલ્મની જેમ સતત ત્રણ- ચાર કલાક હું પોર્ન જોઈ શકતો અને પોતાના આવેગોને શાંત કરવાનો પ્રયત્ન કરતો. પણ આ આવેગો તો દરિયાનાં મોજાની જેમ થોડીવાર પછી પાછા ત્રાટકતા અને હું પાણી-પાણી, ફીણ -ફીણ થઇ જતો.
પુણે આવ્યા પછી મેં ઘણાં સેક્સટોય્ઝ ઓનલાઇન મંગાવેલાં. સિલિકોનનાં અને રબરનાં બનેલાં આ સેક્સટોય્ઝ જ મારો સહારો હતાં. હું નવા નવા પ્રકારનાં સેક્સટોય્ઝ મંગાવે જતો હતો. દસેક દિવસ પછી એ સેક્સટોય્ઝ પણ જાણે એનો ચાર્મ ગુમાવી દેતાં હોય એમ નકામાં થઇ જતાં. પુણેના રેડલાઈટ એરિયામાં પણ હું જવા લાગ્યો હતો પણ અસ્મિતા જેવો આનંદ મને કોઈ જ આપી શક્યું નહોતું.
અસ્મિતા સાથેની રાતો મને ઘણીવાર યાદ આવી જતી. એનું શરીર અને એની સેક્સટોક – બધું વારેવારે યાદ આવતું અને મારી આંખોમાં દરિયો છલકાતો. અસ્મિતાને મેં દિલથી ચાહી હતી, એટલે જ કદાચ એની સાથેના સેક્સમાં સંતોષનો ઓડકાર આવતો. પ્રેમની છાલક અને આત્મીયતા એના આશ્લેષમાં અનુભવી શકાતાં. એના શરીરની મહેક મગજમાં અળસિયાની જેમ સળવળતી રહેતી અને મારો અજંપો વધતો રહેતો.
આજે બ્રેકઅપ થયાનાં દોઢ વરસ પછી હું ડિપ્રેશનમાંથી બહાર આવવાને બદલે એમાં ઊંડે ને ઊંડે ડૂબતો જઈ રહ્યો હતો. મારા ક્લાસમેટ્સ પાસઆઉટ થઈને જોબ પર લાગી ગયા હતાં. હવે કોલેજમાં પોતાના કહી શકાય એવા કોઈ દોસ્તો બચ્યા નહોતા.
મને વરસાદનાં દિવસોમાં કોલેજનાં દોસ્તોની યાદ આવી જતી. હું, સુમિત, નિકુંજ, અસ્મિતા, આયુષી બધા જ મોમોસ અને પનીર ભજીયા ખાવા ટપરી પર જમા થતાં. ચા પીતાં પીતાં કોલેજનાં પ્રોફેસરોની મજાક ઉડાવતાં. રસ્તા પરથી પસાર થતી છોકરીઓને લોકો તાક્યા કરતા પણ હું તો સ્કેન કરી શકતો. મારી આંખો એટલી તીક્ષ્ણ બની ચૂકેલી કે એ સામે ઉભેલી છોકરીનાં કપડાં ચીરીને શરીર જોઈ શકતી!
ધોધમાર વરસાદમાં હું અસ્મિતાને ચીપકીને ઊભો રહેતો. એના ભીના અને શરીરને ચોંટી ગયેલા કપડાં જોઈને મારી અંદર તોફાન આવતું અને એ તોફાનમાં અમે બંને એકબીજાને રાતભર તહેસ-નહેસ કરી નાખતાં…..
છ મહિના પછી મારા અને કીર્તિનાં લગ્નનું મુહૂર્ત આવ્યું હતું. એ છ મહિનામાં હું બે કે ત્રણ વખત જ મુંબઈ આવ્યો હતો. અહીં પુણેના મારા રૂમમાં મારું પોર્ન એડિક્શન સીમા વળોટી ચૂક્યું હતું. એટલા પોર્ન વિડીયો હું જોઈ ચૂકેલો કે આંખો બંધ કરતા જ પોર્ન વિડીયો આપોઆપ મારી નજર સામે ચાલુ થઇ જતો. પોર્ન વિડીયોની એટલી હદ સુધી હું પહોંચી ગયો હતો કે હવે એમાં આવતી મોડેલ્સનાં ચહેરા મને દેખાતા નહિ. મને ફક્ત એમનું ચમકતું અને ભરાવદાર શરીર જ દેખાતું.
*****
આજે હું અને કીર્તિ ફર્સ્ટ નાઈટ માટે સજાવેલા હોટેલનાં હનીમૂન સ્વીટમાં છીએ. છેલ્લા બે દિવસથી લગ્નનાં રીતિરીવાજોમાં વ્યસ્ત રહેવાને લીધે મને સેક્સની પ્રબળ ઈચ્છાઓ ભરડામાં લઇ રહી હતી. પણ આજે એ ઇચ્છાઓની પૂર્તિની મધુર ક્ષણ આવી પહોંચી છે. જે કીર્તિનાં આછા ગુલાબી શરીર સાથે પોતાના કાલ્પનિક જગતમાં હું ઘણીવાર સેક્સ માણી ચૂક્યો છું એ જ કીર્તિનાં શરીરને આજે વાસ્તવિક જગતમાં માણવા મળશે એ કલ્પનાથી મારા રૂંવાડાં ઊભા થઇ ગયા છે.
બેડ પરનાં સફેદ ઓછાડ પર ગુલાબની પાંદડીઓથી દિલ ચીતરેલું છે. ટમટમ બળતાં દીવાઓનો મદમસ્ત પ્રકાશ રૂમમાં વેરાયો છે. એરફ્રેશનરની સુગંધ વાતાવરણને ઓર નશીલું બનાવી રહી છે. રૂમનાં કોઈ ખૂણેથી ધીમા અવાજે રોમૅન્ટિક ઇન્સ્ટ્રુમેન્ટલ મ્યુઝિક વાગી રહ્યું છે અને આ બધાની વચ્ચે મારા શરીરમાં સેક્સનાં તણખા ચિનગારીનું રૂપ લઇ રહ્યાં છે.
થોડીવાર પછી કીર્તિ વનપીસ પહેરીને બાથરૂમથી બહાર આવે છે. મારી આંખો એના શરીરને સ્કેન કરે છે. એ કીર્તિના ચહેરાને જોઈ શકતી નથી. એ તો કોઈ શિકારીની જેમ એનો શિકાર કરવા તડપી રહી છે. કીર્તિ જેમજેમ મારી નજીક આવતી જાય છે તેમ તેમ મારી અંદર ગરમી વધતી જાય છે. મારો હાથ મારી ઉઘાડી ટ્રીમ કરેલી છાતી પર માદકતાથી ફરે છે. હવે કીર્તિ મારી એકદમ નજીક આવી ગઈ છે. હું એના મલાઈદાર હોઠને ચૂમી રહ્યો છું. કીર્તિનો એક હાથ મારી છાતી પર ઉત્તેજિત કરવાની અદાથી ફરી રહ્યો છે. એકાએક મારી અંદર સેક્સનું રાનીપશુ જાગી જાય છે અને હું કીર્તિને ઊંચકીને પલંગ પર પટકું છું. કીર્તિ કંઈ સમજી શકે એ પહેલા જ હું એના શરીરને કાબુમાં લઈ લઉં છું. કીર્તિનું શરીર વાઘના પંજામાં ફસાયેલા હરણની જેમ તરફડીયા મારવા લાગે છે પણ હું એના શરીરને વેતરતો, છોલતો અને લોહીલુહાણ કરતો રહું છું.
હું પોર્ન વીડિયોમાં જોયેલો ઈરોટિક અને વાઈલ્ડ પુરુષ બની ગયો છું. કીર્તિ મારી ભીંસમાંથી છૂટવા મારા શરીરને નહોરિયાં ભરી રહી છે. એની આંખો, નાક, કાન અને આખો ચહેરો લાલઘૂમ થઇ ગયા છે. એના હોઠથી લઈને આખું શરીર કોઈ જંગલી પશુની માફક મેં કરડી ખાધું હોય એ રીતે ઘાયલ થયું છે. એની લાલાશ પકડેલી આંખોમાંથી ઉનાઉનાં આંસુ નીકળીને ઓશિકામાં લપાઈ રહ્યાં છે. શરુશરૂમાં આવતા કીર્તિના ઉંહકારા એકાએક પીડાની ચીસમાં પલટાઈ ગયા છે. હું પોતાના આકરા પંજાથી એનાં ચહેરાને દબાવી દઉં છું.
પીડાની વધુ એક તીવ્ર ચીસ રોમૅન્ટિક ઇન્સ્ટ્રુમેન્ટલ મ્યુઝિકને દાબી દે છે. પસીનાથી ઉઠેલી વાસ એરફ્રેશનરની સુંગધને ચીરી નાખે છે. હવસનો કાળો ચહેરો ટમટમ થતાં દીવા ઓલવી નાંખે છે. કપાયેલી ગરોળીની પૂંછડીની જેમ હાથપગ પછાડી એ શરીર દાઝી ગયેલા રોટલાની જેમ કાળું થઇ પડે છે. વ્યવસ્થિત સજાવેલા હનીમૂન સ્પેશ્યલ રૂમની ફર્શ પર, બેડ પર અવ્યવસ્થાના ભાગરૂપે મોંઘાદાટ કપડાં અનાથની જેમ પડ્યાં રહે છે.
પોતાની હિંસક તરસને છીપાવી દીધા પછી હું ઊભો થાઉં છું અને બેડ પર લસ્ત થઈને પડેલા શરીરને જોઉં છું. હા, ફક્ત શરીરને – જેનો હવે કોઈ ચહેરો નથી…..